Steel Rate : केंद्र सरकारने २२ सप्टेंबरपासून वस्तू आणि सेवा कर (GST) चे नवीन दर लागू केल्यामुळे दैनंदिन वापरातील वस्तूंव्यतिरिक्त बांधकाम साहित्याच्या किमतीतही घट झाली आहे. विशेषतः, बांधकाम क्षेत्रासाठी अत्यंत महत्त्वाचे असलेले सिमेंट आता स्वस्त झाले आहे. यामुळे घर बांधण्याचे स्वप्न पाहणाऱ्या मध्यमवर्गीय नागरिकांना तसेच बांधकाम व्यावसायिकांना मोठा दिलासा मिळाला आहे.
सिमेंटवर जीएसटीत मोठी कपात (Steel Rate)
या नवीन नियमांनुसार, सिमेंटवर पूर्वी लागू असलेला २८ टक्के जीएसटी आता १८ टक्क्यांवर आणण्यात आला आहे. म्हणजेच, सिमेंटच्या जीएसटी दरात थेट १० टक्क्यांची कपात झाली आहे.
मागील १५ वर्षांपासून बांधकाम साहित्याचा व्यवसाय करणारे भास्कर जाधव यांनी दिलेल्या माहितीनुसार, या दरकपातीमुळे प्रति बॅग सिमेंट २५ ते ३० रुपयांनी स्वस्त झाले आहे.
- उदाहरणार्थ, बिर्ला सुपर सिमेंटची एक बॅग जी पूर्वी ३७५ रुपयांना मिळत होती, ती आता ३५० रुपयांना मिळत आहे.
- त्याचप्रमाणे, जेके सुपर सिमेंटच्या बॅगेची किंमत पूर्वी ३२० रुपये होती, ती आता ३०० रुपयांवर आली आहे.
सिमेंटच्या दरातील या घसरणीमुळे बाजारात मागणी वाढत असल्याचेही जाधव यांनी स्पष्ट केले.
घर बांधणी खर्चात बचत होण्याची शक्यता
बांधकामासाठी सर्वाधिक वापरल्या जाणाऱ्या सिमेंटची किंमत कमी झाल्याने सामान्य ग्राहकांपासून लहान-मोठ्या बांधकाम व्यावसायिकांपर्यंत सर्वांना थेट फायदा होणार आहे. घर बांधण्याचे स्वप्न पूर्ण करू पाहणाऱ्या सर्वसामान्य नागरिकांना आणि मध्यमवर्गीयांना यातून मोठा दिलासा मिळण्याची अपेक्षा आहे.
अन्य साहित्याच्या किमती जैसे थे
बांधकाम साहित्यात महत्त्वाचे असलेल्या स्टील (लोखंडी सळई) च्या जीएसटी दरात मात्र कोणताही बदल करण्यात आलेला नाही. त्यामुळे लोखंडी सळईच्या किमतीत फारसा फरक पडलेला नाही. तसेच, वाळू, रेती यांसारख्या इतर साहित्याच्या किमती स्थानिक बाजारपेठेतील उपलब्धता आणि वाहतूक खर्चावर अवलंबून असल्याने त्यात लक्षणीय घट झालेली नाही.
तरीही, सिमेंटमध्ये झालेली कपात ही बांधकाम क्षेत्रासाठी मोठा दिलासा मानली जात आहे.
नागरिकांना दिलासा देण्याचा उद्देश
सरकारने केलेल्या या जीएसटी फेरबदलाचा मुख्य उद्देश नागरिकांना आवश्यक वस्तू कमी दरात उपलब्ध करून देणे हा आहे. बांधकाम साहित्य स्वस्त झाल्यामुळे चालू असलेली बांधकामे गतीमान होतील, तसेच नवीन गृहनिर्माण प्रकल्पांनाही चालना मिळेल, असा अंदाज तज्ज्ञ व्यक्त करत आहेत.
सध्या पुणे आणि आसपासच्या भागात गृहनिर्माण क्षेत्रात मोठ्या प्रमाणावर कामे सुरू असल्याने सिमेंटच्या दरांमध्ये झालेली ही घसरण बांधकाम व्यावसायिक आणि घर खरेदीदार दोघांसाठीही एक सकारात्मक संकेत ठरत आहे. सरकारचा हा निर्णय आगामी काळात गृहनिर्माण क्षेत्राला मोठी मदत करेल, अशी अपेक्षा व्यक्त होत आहे.
